Andaina nocturna nas Fragas do Eume á luz da lúa

O sábado 14 de xuño, a asociación Eumenatura propón unha experiencia distinta para conectar coa natureza dun xeito pouco habitual: unha andaina nocturna polas Fragas do Eume, coincidindo coa lúa chea de fresa, un fenómeno que cada ano marca o calendario lunar de xuño.

A actividade dará comezo ás 21:00 horas, cunha ruta circular de aproximadamente 10 quilómetros, pensada para camiñantes cunha condición física básica pero suficiente para moverse por sendeiros de monte. Desde o alto das fragas, os participantes poderán gozar do solpor sobre a paisaxe atlántica, para logo continuar a camiñada iluminados pola lúa chea, que nesta ocasión recibe o nome tradicional de «lúa de fresa» por coincidir co tempo da colleita deste froito en moitas culturas.

A organización recomenda levar roupa e calzado axeitado para sendeirismo, así como frontal ou lanterna de man. A ruta inclúe subidas e baixadas, polo que, malia estar catalogada como de dificultade media/baixa, non deixa de ser unha actividade de montaña. Poderán participar nenos a partir de 8 anos, sempre acompañados por unha persoa adulta.

Para facer máis agradable o traxecto, haberá avituallamento a medio camiño e ao final da ruta, con auga ou cervexa para repoñer forzas. A chegada está prevista arredor das 24:00 horas.

O prezo da actividade é de 12 euros por adulto e 6 euros por neno, e as prazas son limitadas. A inscrición realízase a través da web de Eumenatura:
eumenatura.com/inscripciones-a-las-andainas-2

Para máis información, tamén está dispoñible o teléfono 630 135 251 ou o correo contacto@eumenatura.com.